2026-жылдын 2-июнунда Бишкек шаарында Кыргыз Республикасынын Суу ресурстары, айыл чарба жана кайра иштетүү өнөр жайы министрлиги, KOICA жана Good Neighbors Kyrgyz Republic тарабынан биргелешип ишке ашырылып жаткан Кыргыз Республикасында Айылдарды комплекстүү өнүктүрүү долбоорунун экинчи фазасынын расмий ачылыш аземи болуп өттү.
Иш-чарага Кыргыз Республикасынын Суу ресурстары, айыл чарба жана кайра иштетүү өнөр жайы министринин орун басары Рустам Анарбекович Балтабаев, Корея Республикасынын Кыргыз Республикасындагы Атайын жана Ыйгарым укуктуу Элчиси Ким Кванджэ, Кыргыз Республикасындагы KOICA өкүлчүлүгүнүн директору Лим Соён, Good Neighbors Kyrgyz Republic уюмунун директору Чо Сунхенг, ошондой эле мамлекеттик органдардын, эл аралык уюмдардын жана өнөктөш мекемелердин өкүлдөрү катышты.
Коноктор өздөрүнүн куттуктоо сөздөрүндө Кыргыз Республикасындагы Айылдарды комплекстүү өнүктүрүү долбоорунун аймактардын туруктуу социалдык-экономикалык өнүгүүсү үчүн стратегиялык маанисин белгилешип, Кыргыз Республикасы менен Корея Республикасынын ортосундагы кызматташтыкты мындан ары чыңдоонун маанилүүлүгүн баса белгилешти.
Аземдин жүрүшүндө долбоордун биринчи фазасынын негизги жыйынтыктары жана Ош, Баткен жана Жалал-Абад облустарында ишке ашырыла турган экинчи фазанын негизги багыттары тааныштырылды.
Белгилей кетсек, буга чейин, 2026-жылдын 1-июнунда Кыргыз Республикасынын Суу ресурстары, айыл чарба жана кайра иштетүү өнөр жайы министрлиги, Кореянын эл аралык кызматташтык агенттиги (KOICA) жана Good Neighbors Kyrgyz Republic Кыргыз Республикасында Айылдарды комплекстүү өнүктүрүү долбоорунун экинчи фазасын ишке ашыруу боюнча үч тараптуу Өз ара түшүнүшүү жөнүндө меморандумга кол коюшкан.
Долбоордун жаңы этабы фермерлерди жана айыл чарба кооперативдерин колдоого, кайра иштетүү тармагын өнүктүрүүгө, айылдык инфраструктураны модернизациялоого, логистикалык борбор түзүүгө, микрокаржылоо кызматтарына жеткиликтүүлүктү кеңейтүүгө жана агрардык секторго санариптик чечимдерди киргизүүгө багытталган.
Биз биргеликте айыл аймактарынын туруктуу өнүгүүсүнө көмөк көрсөтүү, айыл калкынын бакубаттуулугун жогорулатуу жана Кыргыз Республикасынын агроөнөр жай потенциалын чыңдоо багытындагы иштерди улантабыз.
2026-жылдын 1-июнунда Кыргыз Республикасынын Суу ресурстары, айыл чарба жана кайра иштетүү өнөр жайы министрлиги, KOICA жана Good Neighbors International уюму Кыргыз Республикасында Айылдарды комплекстүү өнүктүрүү долбоорунун экинчи фазасын ишке ашыруу боюнча үч тараптуу өз ара түшүнүшүү жөнүндө меморандумга кол коюшту.
Меморандумга кол коюу айыл аймактарын туруктуу өнүктүрүүгө жана айыл калкынын жашоо деңгээлин жогорулатууга багытталган өнөктөштүктү чыңдоодогу маанилүү кадам болду.
Долбоордун экинчи фазасы Ош, Баткен жана Жалал-Абад облустарында ишке ашырылып, фермерлерди жана айыл чарба кооперативдерин колдоону, айылдык жана логистикалык инфраструктураны өнүктүрүүнү, микрокредиттөө мүмкүнчүлүктөрүн кеңейтүүнү, ошондой эле агрардык секторго заманбап технологияларды киргизүүнү камтыйт.
Долбоор 2021–2025-жылдары ийгиликтүү ишке ашырылган биринчи фазанын уландысы болуп саналат. Бул мезгил аралыгында айыл чарбасынын өндүрүмдүүлүгүн жогорулатуу, мал чарбасын өнүктүрүү, айылдык инфраструктураны жакшыртуу жана айылдык үй чарбаларынын кирешелерин көбөйтүү боюнча олуттуу жыйынтыктарга жетишилди.
Долбоордун экинчи фазасын ишке ашыруу аймактардын агроөнөр жай потенциалын мындан ары өнүктүрүүгө, айылдык жамааттардын экономикалык туруктуулугун чыңдоого жана калктын жашоо сапатын жакшыртууга өбөлгө түзөт.
Урматтуу балдар, ата-энелер, мугалимдер жана өсүп келе жаткан муундун келечеги үчүн кам көргөн жалпыңыздар!
Good Neighbors Kyrgyz Republic сиздерди Эл аралык балдарды коргоо күнү менен чын жүрөктөн куттуктайт!
Бул күн бизге эң маанилүү нерсени эске салат: ар бир бала бактылуу балалыкка, сүйүүгө, камкордукка, коопсуздукка жана өз мүмкүнчүлүктөрүн толук ачууга татыктуу. Балдар — биздин келечегибиз, шыктандыруубуз жана жакшы дүйнөгө болгон үмүтүбүз.
35 жылдан бери Good Neighbors дүйнө жүзүндөгү балдардын жыргалчылыгы үчүн эмгектенип келет. Бүгүнкү күндө уюм 40тан ашуун өлкөдө миллиондогон адамдардын жашоосуна оң таасирин тийгизип, балдардын укуктарын коргоого, алардын бакубат жашоосуна жана коомчулуктардын инклюзивдүү өнүгүшүнө өзгөчө көңүл бурууда.
Кыргызстанда Good Neighbors Intentional өз ишмердүүлүгүн 2014-жылдан бери жүргүзүп келет. Ушул жылдар аралыгында биз өнөктөштөр, жергиликтүү жамааттар, мектептер жана үй-бүлөлөр менен биргеликте балдардын дени сак өсүшү, сапаттуу билим алышы, таланттарын өнүктүрүшү жана өздөрүн коопсуз сезиши үчүн шарттарды түзүп келебиз.
Бул өзгөчө күнү ар бир балага жаркын жылмаюу, кубанычтуу ачылыштар, ишенимдүү достор жана келечекке болгон бекем ишеним каалайбыз. Кыялдарыңар орундалып, силерди ар дайым колдогон, шыктандырган жана чоң ийгиликтерге карай алгачкы кадамды таштоого жардам берген адамдар жаныңарда болсун.
Майрамыңыздар менен! Эл аралык балдарды коргоо күнү кут болсун!
Калктын муктаждыктарын комплекстүү баалоонун алкагында Чүй, Ысык-Көл, Ош жана Жалал-Абад облустарындагы Көк-Чу, Болот Мамбетова, Бел-Алды жана Жапалак КӨДдөрүндө (Коомчулукту өнүктүрүү долбоорлору) фокус-топтук талкуулардын (Focus Group Discussions — FGD) сериясы ийгиликтүү өткөрүлдү.
Талкууларга мугалимдер, медицина кызматкерлери, ата-энелер, жаштар, фермерлер, ишкерлер, жергиликтүү өз алдынча башкаруу органдарынын өкүлдөрү, ошондой эле калктын аялуу катмарларынын өкүлдөрү катышты. Фокус-топтор жамааттардагы актуалдуу көйгөйлөрдү ачык талкуулоо, артыкчылыктуу муктаждыктарды аныктоо жана мүмкүн болгон чечимдерди издөө үчүн аянтча болуп берди.
Талкуулардын жүрүшүндө билим берүү, саламаттык сактоо, таза суу жана санитарияга жеткиликтүүлүк, укуктарды коргоо, социалдык колдоо, жумуш менен камсыз кылуу жана калктын киреше булактарын өнүктүрүү маселелери каралды. Өзгөчө көңүл аялуу топтордун көйгөйлөрүнө, негизги кызматтарга жеткиликтүүлүккө, жашоо шарттарын жакшыртууга жана жергиликтүү жамааттардын потенциалын чыңдоого бурулду.
Фокус-топтук талкуулар сапаттуу маалыматтарды чогултууга жана калктын муктаждыктарды баалоо процессине активдүү катышуусун камсыз кылууга мүмкүнчүлүк берди. Алынган жыйынтыктар келечектеги пландаштыруу иштеринде жана коомчулуктун реалдуу муктаждыктарына багытталган практикалык программаларды жана демилгелерди иштеп чыгууда колдонулат.
Ош шаарындагы №48 Керме-Тоо орто мектебинде жана М. Мырзаев атындагы №45 орто жалпы билим берүү мектебинде жогорку класстын окуучулары арасында экологиялык дебаттар (Eco-Debate) ийгиликтүү өткөрүлдү.
Көпчүлүк окуучулар үчүн бул дебаттарга биринчи жолу катышуу тажрыйбасы болгонуна карабастан, алар башынан эле чоң кызыгуу, активдүүлүк жана экологиялык актуалдуу маселелерди талкуулоого болгон чыныгы катышуусун көрсөтүштү. Иш-чаранын жүрүшүндө катышуучулар өз ойлорун жүйөлүү билдирүүгө, каршы тарапты угууга, командада иштөөгө жана биргелешип чечим табууга үйрөнүштү.
Эко-дебаттар коом алдында сүйлөө, сынчыл ой-жүгүртүү, лидерлик жана командада иштөө көндүмдөрүн өнүктүрүү үчүн маанилүү аянтча болду.
Мындай демилгелер жаштарды мындан ары өнүгүүгө жана жаңы дебаттык турнирлерге активдүү катышууга шыктандырып, жарандык активдүү позицияны калыптандырат деген үмүттөбүз.
Жалал-Абад облусунун Токтогул районуна караштуу Абды-Суеркулов айыл аймагындагы №21 Ы. Алымбеков атындагы орто мектебинин окуу-тарбия иштери боюнча директордун орун басары — Кадыралиева Элнура Сакабековна — өзүнүн жогорку жетишкендиктери, кесипкөйлүгү жана педагогикалык ишмердүүлүккө болгон берилгендиги менен кесиптештерине дем берип келет.
2026-жылдын жыйынтыгы менен ал «Жылдын мыкты мугалими» ардактуу наамына татыктуу болуп, ошондой эле «Улут сыймыгы» төш белгиси менен сыйланды.
Өзгөчө сыймык жараткан жетишкендиктеринин бири — 2026-жылдын 7-майында республикалык деңгээлде өткөн «Лидер мугалим» сынагына катышып, 651 мугалимдин арасынан мыкты жыйынтык көрсөтүп, Сингапурга билим берүү багытындагы жолдомону жеңип алышы болду.
Белгилей кетсек, Элнура Сакабековна Жалал-Абад облусунун Токтогул районундагы Бел-Алдыдагы Коомчулукту өнүктүрүү долбоорлорунун ишмердүүлүгүнө активдүү катышып, билим берүүнү өнүктүрүүгө, жергиликтүү коомчулуктун демилгелерин колдоого жана жаш муунду тарбиялоого зор салым кошуп келет.
Кадыралиева Элнура Сакабековнаны жетишкен ийгиликтери жана татыктуу сыйлыктары менен чын жүрөктөн куттуктайбыз! Бекем ден соолук, жаңы ийгиликтерди жана билим берүү тармагында мындан аркы чоң жетишкендиктерди каалайбыз!
2026-жылдын 21-майында Good Neighbors Kyrgyz Republic уюмунун директору Чо Сунхенг менен К.И. Скрябин атындагы Кыргыз улуттук агрардык университетинин ректору Нурзат Эрмековна Тотубаева менен жолугушуу болуп өттү.
Жолугушуунун жүрүшүндө тараптар мындан аркы кызматташуу маселелерин, биргелешкен ишмердүүлүктүн келечектүү багыттарын, ошондой эле айыл чарба, билим берүү жана жергиликтүү жамааттарды өнүктүрүү боюнча долбоорлорду ишке ашырууну талкуулашты. Өзгөчө көңүл инновациялык агротехнологияларды киргизүүгө, илимий-изилдөө иштерин өнүктүрүүгө жана фермерлердин квалификациясын жогорулатууга бурулду.
Жолугушуунун жыйынтыгында Good Neighbors Kyrgyz Republic менен К.И. Скрябин атындагы Кыргыз улуттук агрардык университетинин ортосунда Кызматташуу жөнүндө меморандумга кол коюлду. Меморандум заманбап агротехнологияларды киргизүү, айыл чарба өсүмдүктөрүн өстүрүү, анын ичинде IN VITRO илимий-өндүрүштүк лабораториясы аркылуу иш алып баруу, ошондой эле биргелешкен илимий жана билим берүү демилгелерин ишке ашыруу багытындагы өнөктөштүктү бекемдөөгө багытталган.
Кол коюу аземинен кийин Good Neighbors Kyrgyz Republic уюмунун өкүлдөрү үчүн IN VITRO илимий-өндүрүштүк лабораториясына экскурсия уюштурулду. Экскурсиянын жүрүшүндө лабораториянын ишмердүүлүгүнүн жыйынтыктары, анын ичинде заманбап биотехнологияларды колдонуу менен вируссуз картошка жана башка айыл чарба продукцияларын өстүрүү боюнча иштер тааныштырылды.
Белгилей кетсек, ушул жылы Good Neighbors Kyrgyz Republic университет менен биргеликте Ысык-Көл облусунун Болот Мамбетов айылында вируссуз көчөттөрдү өстүрүү боюнча пилоттук долбоорду ишке ашырууда.
Тараптар бул кызматташтык Кыргызстандын айыл чарбасын өнүктүрүүгө жана фермерлерди колдоого багытталган туруктуу жана натыйжалуу долбоорлорду ишке ашырууга өбөлгө түзөрүнө ишеним билдиришти.
Эл аралык гуманитардык уюм Кыргыз Республикасындагы Good Neighbors International (GNI) төмөнкү бош кызмат орундарга талапкерлерди кабыл алат:
Ачык вакансиялар:
- Программдык адис – Бишкек шаары
- Бухгалтер – Бишкек шаары
- Community Development Project (CDP) Officer – Бел-Алды, Токтогул району
- Community Development Project (CDP) Officer – Жапалак / Ош шаары
Good Neighbors International уюму Кыргызстанда 2014-жылдан бери Чүй, Ош, Жалал-Абад жана Ысык-Көл облустарында коомчулукту өнүктүрүү долбоорлорун ишке ашырып келет.
📩 Кызыккан талапкерлер арызын (резюме, Application Form for Employment Good Neighbors Kyrgyz Republic, ошондой эле кошумча документтер — сунуш каттар, сертификаттар ж.б.) англис тилинде төмөнкү электрондук дарекке жөнөтүшү керек: gnkgz@goodneighbors.kg
Документтерди кабыл алуу мөөнөтү: 2026-жылдын 10-майы
Толук маалымат https://employment.kg/ сайтында жайгаштырылган.
Good Neighbors International уюму 35 жылдан бери жакырчылык менен күрөшүүгө багытталган ишмердүүлүгүн активдүү жүргүзүп келет. Анын ишинин негизинде жакырчылыктан, кырсыктардын кесепеттеринен жана социалдык алсыздыктан жапа чеккен адамдардын укуктарын жана кадыр-баркын коргоо турат.
Бул жылдар аралыгында Good Neighbors дүйнө жүзү боюнча долбоорлорду ишке ашырып, балдарды, үй-бүлөлөрдү жана коомчулуктарды колдоп, туруктуу өнүгүүгө жана жашоо сапатын жакшыртууга салым кошуп келет.
Биз бардык өнөктөштөргө, донорлорго жана коомчулуктарга ишеним, колдоо жана биргелешкен иш үчүн чын жүрөктөн ыраазычылык билдиребиз.
Биз биргеликте ар бир адам татыктуу жашап, жакшы келечекке үмүтү бар дүйнөнү түзүүнү улантабыз.