Good Neighbors Kyrgyz Republic кызматкерлери үчүн тренинг: «Эмоционалдык чарчоонун алдын алуу».
2026-жылдын 30-июлунда Good Neighbors Kyrgyz Republic кызматкерлери үчүн «Эмоционалдык чарчоонун алдын алуу» темасында тренинг өткөрүлдү.
Иш-чара кызматкерлердин эмоционалдык чарчоо, анын негизги белгилери, пайда болуу себептери жана кесепеттери тууралуу маалымдуулугун жогорулатууга, ошондой эле алдын алуунун жана эмоционалдык жыргалчылыкты сактоонун натыйжалуу ыкмалары менен тааныштырууга багытталган.
Эки сааттык программанын жүрүшүндө катышуучулар кесиптик чарчоонун алдын алуу жана өзүн-өзү диагностикалоо куралдарын практикалык жактан өздөштүрүүгө багытталган бир катар интерактивдүү сессиялардан өтүштү. Тренингдин алкагында кызматкерлер тобокелдик факторлорун жана бул абалдын алгачкы белгилерин карап чыгышты. Андан соң катышуучулар жеке тобокелдик факторлорун аныктоого жана кесиптик ресурстарды талдоого багытталган практикалык көнүгүүлөрдү аткарышты.
Өзгөчө көңүл «Баарлашуу жана Коммуникация» темасына бурулду — катышуучулар топто натыйжалуу өз ара аракеттенүү көндүмдөрүн талкуулашты, булар эмоционалдык чарчоонун алдын алууда жана туруктуулукту камсыздоодо маанилүү шарт болуп саналат. Программа ошондой эле командалык рефлексияны жана практикалык көнүгүүлөрдү камтыды.
Тренинг ачык диалог жана командалык өз ара аракеттенүүнү бекемдөө үчүн маанилүү аянтча болуп, жагымдуу жумуш чөйрөсүн түзүүгө жана кызматкерлердин кесиптик стресске туруктуулугун жогорулатууга өбөлгө түздү.
Урматтуу кесиптешибиз Алымбекова Фатима f.mishaevna кызыктуу программасы жана кесипкөйлүгү үчүн ыраазычылык билдиребиз.
Кыргыз Республикасындагы Гуд Нейборс 9 октябрь, 2024 жылы Шин Дон Мин атындагы стипендиялык программасынын жыйынтыгын чыгарды, Талас облусунун администрациясы менен биргеликте 4 райондон 36 окуучу тандалып стипендия жана окуу куралдар ыйгарылган. Бул программа 2018 жылдан бери уланып келген иш чара, ар бир баланын чоң потенциалы бар экенине ишенебиз.
#Education #Scholarship #ShinDongMinScholarship
2024-жылдын 8-октябрь күнү "Кыргыз Республикасындагы Гуд Нейборс" мекемеси Токтогул районунун Үч-Терек айылындагы бала бакчанын жаңыланган ашканасынын ачылыш аземин өткөрдү. Бул долбоордун алкагында "Кыргыз Республикасындагы Гуд Нейборс" бала бакчанын жетекчилигине жана администрациясына керектүү курулуш материалдары, ошондой эле заманбап жабдуулар берилген. Заманбап технологиялар менен жабдылган жаңы ашкана балдарга пайдалуу азыктар менен тамактанууга жана дени сак болууга мүмкүнчүлүк берет.
Ошол эле күнү, жергиликтүү бийлик органдарынын, медициналык мекеменин кызматкерлеринин, жергиликтүү тургундардын жана "Кыргыз Республикасындагы Гуд Нейборс" мекемесинин биргелешкен аракети менен өткөрүлгөн оңдоо иштеринин алкагында жаңыланган медициналык борбордун инфраструктурасын ишке киргизүү аземи болуп өттү. "Кыргыз Республикасындагы Гуд Нейборс" мекемесинин каржылоосу жана көмөктөшүүсү менен медициналык борбордун суу менен камсыздоо системасы реконструкцияланган жана бардык негизги бөлмөлөрү ичүүчү таза суу менен камсыз болду.
Бул медициналык борбор регион үчүн стратегиялык мааниге ээ, анткени Токтогул районунун тургундарына гана жардам көрсөтпөстөн (30 миңге жакын адам), ошондой эле Бишкек-Ош жолундагы аварияларды да тейлейт.
#GoodChange #CommunityDevelopment #CleanWaterAccess
Кыргыз Республикасындагы Гуд Нейборс, Ысык-Көл облусунун Тоң районундагы Болот Мамбетов айыл өкмөтүндөгү акыркы селдин кесепетинен жабыр тарткан Эшперов жана Ак-Сай айылдарынын тургундарына атайын керектуу буюмдарды тапшырды.
32 үй-бүлөгө жардам көрсөтүлдү, алардын ичинен Ак-Сай айылынан 25 үй-бүлө жана Эшперов айылынан 7 үй-бүлө. Жардамдын алкагында жабыркагандарга азык-түлүк, керектүү буюмдар жана жеке гигиена каражаттары берилди.
Бул колдоо табигый кырсыктардан улам татаал кырдаалга туш болгон адамдардын жашоо шарттарын жакшыртууга багытталган. Уюм жабыр тарткан аймактардагы кырдаалды тыкыр көзөмөлдөөнү улантууда.
#EmergencyRelief #EmergencyKit