КӨҢҮЛ БУРУҢУЗДАР! ТЕНДЕРЛЕР!
1) Тендер: Балдар бакчалары үчүн балдар аянтчасын, эмеректерди жана окуу-өнүктүрүү материалдарын жеткирүү
Долбоор жөнүндө:
Чүй, Ысык-Көл, Жалал-Абад жана Ош облустарындагы балдар бакчалары үчүн оюн жабдууларын, балдар эмеректерин жана окуу-өнүктүрүү материалдарын сатып алуу, жеткирүү жана монтаждоо. Долбоор коопсуз, комфорттуу жана өнүктүрүүчү чөйрөнү түзүүгө, мекемелердин материалдык-техникалык базасын чыңдоого жана мектепке чейинки билим берүүнүн сапатын жогорулатууга багытталган. Бардык жумуштар (жеткирүү, чогултуу жана орнотуу) 2026-жылдын 5-сентябрына чейин толугу менен аякташы керек.
⏰ Тендердик билдирмелерди тапшыруунун акыркы мөөнөтү (дедлайн): 2026-жылдын 17-августу, саат 17:00
Кеңири маалыматты tenders.kg сайтынан 11.08.2026-жылдагы №31310 номери астынан караңыздар.
Tenders.kg сайтына шилтеме.
2) Коммерциялык сунуштарды суроо: Курулуш материалдарын жана санитардык-техникалык жабдууларды жеткирүү
Долбоор жөнүндө:
Жалал-Абад облусунун Үч-Терек айылындагы балдар бакчасынын имаратын кеңейтүү үчүн курулуш материалдарын сатып алуу, жеткирүү жана түшүрүү, ошондой эле Чүй облусунун Нижне-Чүй айыл өкмөтүнө санитардык-техникалык жабдууларды сатып алуу жана жеткирүү. Долбоор балдардын болуу шарттарын жакшыртууга, кошумча окуу аянтчаларын түзүүгө жана мектепке чейинки мекемелерде коопсуздук жана гигиена деңгээлин жогорулатууга багытталган. Жеткирүү 2026-жылдын 25-августуна чейин аякташы керек.
⏰ Коммерциялык сунуштарды тапшыруунун акыркы мөөнөтү (дедлайн): 2026-жылдын 17-августу, саат 17:00
Кеңири маалыматты tenders.kg сайтынан 11.08.2026-жылдагы №31307 номери астынан караңыздар.
Tenders.kg сайтына шилтеме.
Урматтуу балдар, ата-энелер, мугалимдер жана өсүп келе жаткан муундун келечеги үчүн кам көргөн жалпыңыздар!
Good Neighbors Kyrgyz Republic сиздерди Эл аралык балдарды коргоо күнү менен чын жүрөктөн куттуктайт!
Бул күн бизге эң маанилүү нерсени эске салат: ар бир бала бактылуу балалыкка, сүйүүгө, камкордукка, коопсуздукка жана өз мүмкүнчүлүктөрүн толук ачууга татыктуу. Балдар — биздин келечегибиз, шыктандыруубуз жана жакшы дүйнөгө болгон үмүтүбүз.
35 жылдан бери Good Neighbors дүйнө жүзүндөгү балдардын жыргалчылыгы үчүн эмгектенип келет. Бүгүнкү күндө уюм 40тан ашуун өлкөдө миллиондогон адамдардын жашоосуна оң таасирин тийгизип, балдардын укуктарын коргоого, алардын бакубат жашоосуна жана коомчулуктардын инклюзивдүү өнүгүшүнө өзгөчө көңүл бурууда.
Кыргызстанда Good Neighbors Intentional өз ишмердүүлүгүн 2014-жылдан бери жүргүзүп келет. Ушул жылдар аралыгында биз өнөктөштөр, жергиликтүү жамааттар, мектептер жана үй-бүлөлөр менен биргеликте балдардын дени сак өсүшү, сапаттуу билим алышы, таланттарын өнүктүрүшү жана өздөрүн коопсуз сезиши үчүн шарттарды түзүп келебиз.
Бул өзгөчө күнү ар бир балага жаркын жылмаюу, кубанычтуу ачылыштар, ишенимдүү достор жана келечекке болгон бекем ишеним каалайбыз. Кыялдарыңар орундалып, силерди ар дайым колдогон, шыктандырган жана чоң ийгиликтерге карай алгачкы кадамды таштоого жардам берген адамдар жаныңарда болсун.
Майрамыңыздар менен! Эл аралык балдарды коргоо күнү кут болсун!
Калктын муктаждыктарын комплекстүү баалоонун алкагында Чүй, Ысык-Көл, Ош жана Жалал-Абад облустарындагы Көк-Чу, Болот Мамбетова, Бел-Алды жана Жапалак КӨДдөрүндө (Коомчулукту өнүктүрүү долбоорлору) фокус-топтук талкуулардын (Focus Group Discussions — FGD) сериясы ийгиликтүү өткөрүлдү.
Талкууларга мугалимдер, медицина кызматкерлери, ата-энелер, жаштар, фермерлер, ишкерлер, жергиликтүү өз алдынча башкаруу органдарынын өкүлдөрү, ошондой эле калктын аялуу катмарларынын өкүлдөрү катышты. Фокус-топтор жамааттардагы актуалдуу көйгөйлөрдү ачык талкуулоо, артыкчылыктуу муктаждыктарды аныктоо жана мүмкүн болгон чечимдерди издөө үчүн аянтча болуп берди.
Талкуулардын жүрүшүндө билим берүү, саламаттык сактоо, таза суу жана санитарияга жеткиликтүүлүк, укуктарды коргоо, социалдык колдоо, жумуш менен камсыз кылуу жана калктын киреше булактарын өнүктүрүү маселелери каралды. Өзгөчө көңүл аялуу топтордун көйгөйлөрүнө, негизги кызматтарга жеткиликтүүлүккө, жашоо шарттарын жакшыртууга жана жергиликтүү жамааттардын потенциалын чыңдоого бурулду.
Фокус-топтук талкуулар сапаттуу маалыматтарды чогултууга жана калктын муктаждыктарды баалоо процессине активдүү катышуусун камсыз кылууга мүмкүнчүлүк берди. Алынган жыйынтыктар келечектеги пландаштыруу иштеринде жана коомчулуктун реалдуу муктаждыктарына багытталган практикалык программаларды жана демилгелерди иштеп чыгууда колдонулат.
Ош шаарындагы №48 Керме-Тоо орто мектебинде жана М. Мырзаев атындагы №45 орто жалпы билим берүү мектебинде жогорку класстын окуучулары арасында экологиялык дебаттар (Eco-Debate) ийгиликтүү өткөрүлдү.
Көпчүлүк окуучулар үчүн бул дебаттарга биринчи жолу катышуу тажрыйбасы болгонуна карабастан, алар башынан эле чоң кызыгуу, активдүүлүк жана экологиялык актуалдуу маселелерди талкуулоого болгон чыныгы катышуусун көрсөтүштү. Иш-чаранын жүрүшүндө катышуучулар өз ойлорун жүйөлүү билдирүүгө, каршы тарапты угууга, командада иштөөгө жана биргелешип чечим табууга үйрөнүштү.
Эко-дебаттар коом алдында сүйлөө, сынчыл ой-жүгүртүү, лидерлик жана командада иштөө көндүмдөрүн өнүктүрүү үчүн маанилүү аянтча болду.
Мындай демилгелер жаштарды мындан ары өнүгүүгө жана жаңы дебаттык турнирлерге активдүү катышууга шыктандырып, жарандык активдүү позицияны калыптандырат деген үмүттөбүз.