Good Neighbors Kyrgyz Republic жана КНАУ кызматташуу жөнүндө меморандумга кол коюшту
2026-жылдын 21-майында Good Neighbors Kyrgyz Republic уюмунун директору Чо Сунхенг менен К.И. Скрябин атындагы Кыргыз улуттук агрардык университетинин ректору Нурзат Эрмековна Тотубаева менен жолугушуу болуп өттү.
Жолугушуунун жүрүшүндө тараптар мындан аркы кызматташуу маселелерин, биргелешкен ишмердүүлүктүн келечектүү багыттарын, ошондой эле айыл чарба, билим берүү жана жергиликтүү жамааттарды өнүктүрүү боюнча долбоорлорду ишке ашырууну талкуулашты. Өзгөчө көңүл инновациялык агротехнологияларды киргизүүгө, илимий-изилдөө иштерин өнүктүрүүгө жана фермерлердин квалификациясын жогорулатууга бурулду.
Жолугушуунун жыйынтыгында Good Neighbors Kyrgyz Republic менен К.И. Скрябин атындагы Кыргыз улуттук агрардык университетинин ортосунда Кызматташуу жөнүндө меморандумга кол коюлду. Меморандум заманбап агротехнологияларды киргизүү, айыл чарба өсүмдүктөрүн өстүрүү, анын ичинде IN VITRO илимий-өндүрүштүк лабораториясы аркылуу иш алып баруу, ошондой эле биргелешкен илимий жана билим берүү демилгелерин ишке ашыруу багытындагы өнөктөштүктү бекемдөөгө багытталган.
Кол коюу аземинен кийин Good Neighbors Kyrgyz Republic уюмунун өкүлдөрү үчүн IN VITRO илимий-өндүрүштүк лабораториясына экскурсия уюштурулду. Экскурсиянын жүрүшүндө лабораториянын ишмердүүлүгүнүн жыйынтыктары, анын ичинде заманбап биотехнологияларды колдонуу менен вируссуз картошка жана башка айыл чарба продукцияларын өстүрүү боюнча иштер тааныштырылды.
Белгилей кетсек, ушул жылы Good Neighbors Kyrgyz Republic университет менен биргеликте Ысык-Көл облусунун Болот Мамбетов айылында вируссуз көчөттөрдү өстүрүү боюнча пилоттук долбоорду ишке ашырууда.
Тараптар бул кызматташтык Кыргызстандын айыл чарбасын өнүктүрүүгө жана фермерлерди колдоого багытталган туруктуу жана натыйжалуу долбоорлорду ишке ашырууга өбөлгө түзөрүнө ишеним билдиришти.
Балдарды коргоонун эл аралык күнүн белгилөөнүн алкагында Good Neighbors уюмунун Кыргыз Республикасындагы өкүлчүлүгүнүн Болот Мамбетов айыл аймагындагы (Тоң району, Ысык-Көл облусу) Коомчулукту өнүктүрүү долбоорунун командасы долбоордун аймагындагы жети айылдын баарында балдар үчүн майрамдык иш-чараларды уюштурду.
Жаш катышуучулар үчүн аниматорлордун жана костюмчан каармандардын катышуусунда кызыктуу оюн-зоок программасы даярдалды. Балдар оюндарга, сынактарга жана чакан викториналарга катышып, музыкалык программага жана самын көбүкчөлөрүнүн шоусуна күбө болушту. Эң активдүү катышуучулар оюнчуктар жана эстелик белектер менен сыйланышты.
Иш-чаранын жүрүшүндө балдардын коопсуздугу, алардын укуктары жана оор кырдаалдарда жоопкерчиликтүү чоңдордон жардам суроонун маанилүүлүгү тууралуу кыскача маалыматтык сессия өткөрүлдү.
Коомчулукту өнүктүрүү комитеттеринин мүчөлөрү менен биргеликте балдарга 700дөн ашуун таттуу белектер таратылып, бул майрамдын эң күтүлгөн учурларынын бири болду.
Өткөрүлгөн иш-чара балдарга кубаныч жана жагымдуу эмоцияларды тартуулап, ар бир бала үчүн коопсуз жана колдоочу чөйрөнү түзүүнүн маанилүүлүгүн дагы бир жолу эске салды.
4-июнда Good Neighbors Kyrgyz Republic уюму Кыргыз Республикасынын Эмгек, социалдык камсыздоо жана миграция министрлигине караштуу Социалдык коргоо департаментине 7 000ден ашык жаңы балдар кийимин өткөрүп берди.
Гуманитардык жардамды тапшыруунун расмий аземине Кыргыз Республикасынын Эмгек, социалдык камсыздоо жана миграция министрлигине караштуу Социалдык коргоо департаментинин директору Анарбаева Дина Турманбековна, Кыргыз Республикасындагы Good Neighbors International уюмунун директору Чо Сунхёнг, Кыргыз Республикасынын Эмгек, социалдык камсыздоо жана миграция министрлигине караштуу мүмкүнчүлүгү чектелген балдарды реабилитациялоо боюнча «Келечек» борборунун директору Туменбаева Чынаркүл Айдарбековна жана мекеменин кызматкерлери катышты.
Гуманитардык жардам Корея Республикасынан жеткирилип, жакынкы күндөрү өлкө боюнча социалдык стационардык мекемелерге бөлүштүрүлөт. Биз Кыргыз Республикасынын Эмгек, социалдык камсыздоо жана миграция министрлигине караштуу Социалдык коргоо департаментинин директору Дина Турманбековна Анарбаевага кызматташтыгы жана Кыргызстандын балдарынын жыргалчылыгы үчүн биргелешкен иш-аракеттери үчүн терең ыраазычылык билдиребиз.
Биз үчүн ар бир берилген кийим жөн гана буюм эмес, балага болгон камкордуктун, көңүл буруунун жана колдоонун белгиси болуп саналары өзгөчө маанилүү.
Good Neighbors уюму мамлекеттик органдар жана өнөктөштөр менен биргеликте Кыргызстандын балдары жана үй-бүлөлөрү үчүн жакшы келечекти түзүү багытындагы ишин улантат.
2026-жылдын 2-июнунда Бишкек шаарында Кыргыз Республикасынын Суу ресурстары, айыл чарба жана кайра иштетүү өнөр жайы министрлиги, KOICA жана Good Neighbors Kyrgyz Republic тарабынан биргелешип ишке ашырылып жаткан Кыргыз Республикасында Айылдарды комплекстүү өнүктүрүү долбоорунун экинчи фазасынын расмий ачылыш аземи болуп өттү.
Иш-чарага Кыргыз Республикасынын Суу ресурстары, айыл чарба жана кайра иштетүү өнөр жайы министринин орун басары Рустам Анарбекович Балтабаев, Корея Республикасынын Кыргыз Республикасындагы Атайын жана Ыйгарым укуктуу Элчиси Ким Кванджэ, Кыргыз Республикасындагы KOICA өкүлчүлүгүнүн директору Лим Соён, Good Neighbors Kyrgyz Republic уюмунун директору Чо Сунхенг, ошондой эле мамлекеттик органдардын, эл аралык уюмдардын жана өнөктөш мекемелердин өкүлдөрү катышты.
Коноктор өздөрүнүн куттуктоо сөздөрүндө Кыргыз Республикасындагы Айылдарды комплекстүү өнүктүрүү долбоорунун аймактардын туруктуу социалдык-экономикалык өнүгүүсү үчүн стратегиялык маанисин белгилешип, Кыргыз Республикасы менен Корея Республикасынын ортосундагы кызматташтыкты мындан ары чыңдоонун маанилүүлүгүн баса белгилешти.
Аземдин жүрүшүндө долбоордун биринчи фазасынын негизги жыйынтыктары жана Ош, Баткен жана Жалал-Абад облустарында ишке ашырыла турган экинчи фазанын негизги багыттары тааныштырылды.
Белгилей кетсек, буга чейин, 2026-жылдын 1-июнунда Кыргыз Республикасынын Суу ресурстары, айыл чарба жана кайра иштетүү өнөр жайы министрлиги, Кореянын эл аралык кызматташтык агенттиги (KOICA) жана Good Neighbors Kyrgyz Republic Кыргыз Республикасында Айылдарды комплекстүү өнүктүрүү долбоорунун экинчи фазасын ишке ашыруу боюнча үч тараптуу Өз ара түшүнүшүү жөнүндө меморандумга кол коюшкан.
Долбоордун жаңы этабы фермерлерди жана айыл чарба кооперативдерин колдоого, кайра иштетүү тармагын өнүктүрүүгө, айылдык инфраструктураны модернизациялоого, логистикалык борбор түзүүгө, микрокаржылоо кызматтарына жеткиликтүүлүктү кеңейтүүгө жана агрардык секторго санариптик чечимдерди киргизүүгө багытталган.
Биз биргеликте айыл аймактарынын туруктуу өнүгүүсүнө көмөк көрсөтүү, айыл калкынын бакубаттуулугун жогорулатуу жана Кыргыз Республикасынын агроөнөр жай потенциалын чыңдоо багытындагы иштерди улантабыз.